Ish-kryeprokurori Adriatik Llalla ka kërkuar që të mos jetë subjekt i ligjit të Vettingut.
Televizioni Report Tv raporton se ka Llalla ka njoftuar dorëheqjen nga sistemi i drejtësisë, përmes një kërkese drejtuar organeve të Vettingut.
Ish-kryeprokurori Llalla tërhiqet nga e drejta për të qenë gjyqtar i Apelit. Tërheqja nga sistemi i drejtësisë bën që procesi i Vettingut ndaj Llallës të ndërpritet, por për këtë çështje do vendosë Komisioni i Pavarur i Kualifikimit nëse Llalla do i shpëtojë apo jo Vettingut për pasurinë dhe integritetin profesional. Llalla bën pjesë në listën prej 56 personash që po kalon në filtrin e Vettingut.
Adriatik Llalla është akuzuar publikisht pak kohë më parë nga ambasadori amerikan në Tiranë si Prokurori që refuzoi të hetojë politikanët e korruptuar. Akuza në drejtim të Llallës ka pasur edhe nga maxhoranca për “kyçjen” e disa dosjeve të krimit dhe korrupsionit në vend. Mandati i tij si Kryeprokuror përfundoi në datën 7 dhjetor 2017, ndërsa në 18 dhjetor Kuvendi zgjodhi si pasuese të Llallës, por me mandat të përkohshëm, ish-prokuroren e Shkodrës, Arta Marku.
