Lista Serbe nuk ka ndryshuar qëndrimin e saj, në raport me nismën për themelimin e ushtrisë së Kosovës, ka thënë për radion Evropa e Lirë, Branimir Stojanoviç, zëvendëskryeministër në Qeverinë e Kosovës.
Sipas tij, bisedimet për ushtrinë e Kosovës, të cilat i ka paralajmëruar presidenti Hashim Thaçi, nuk janë në interesin e serbëve që jetojnë në Kosovë.
“Transformimi i Forcave të Sigurisë së Kosovës, në Forca të Armatosura, për ne nuk është fare temë për bisedime dhe çdo diskutim për këtë çështje, për ne do të ishte vetëm humbje kohe”, tha Stojanoviç.
Ai tha, po ashtu, se mund të diskutohet me presidentin e Kosovës apo liderët e tjerë vendor, por, për ushtrinë nuk ka hapësirë për të arritur ndonjë përparim në negociata.
Nisma për themelimin e ushtrisë së Kosovës, ka nënvizuar ai, u ka shërbyer liderëve kosovarë vetëm për nevoja të brendshme, ngase kjo temë, sipas tij, nuk ka si qëllim zgjidhjen e problemeve me të cilat po ballafaqohen sot qytetarët e vendit.
Pas bojkotit prej gjashtë muajve, Lista Serbe është kthyer në institucionet e Kosovës, duke ruajtur kështu postet ministrore në qeveri dhe mandatet e deputetëve në Kuvend.
Kthimin e deputetëve serbë e ka mirëpritur Qeveria e Kosovës, e cila ka paralajmëruar se tani mund të arrihen 80 votat e nevojshme në Kuvend, për ratifikimin e Marrëveshjes së demarkacionit të kufirit me Malin e Zi, si kushti i fundit i vënë nga Komisioni Evropian për heqjen e vizave.
Por, Stojanoviç thotë se Lista Serbe nuk ka ende një qëndrim të prerë rreth demarkacionit, dhe ka kritikuar ata që llogarisin votat e serbëve, sa herë që bllokohet ndonjë vendimmarrje.
“Atëherë kur nuk ka mundësi që brenda deputetëve shqiptarë të arrihet shumica, fajësia hidhet te serbët. Por, siç nuk kemi qenë fajtor në të kaluarën nuk do të jemi as në të ardhmen”, ka thënë Stojanoviç.
Një çështje tjetër për të cilën Lista Serbe thotë se do të angazhohet është themelimi i Asociacionit të Komunave me Shumicë Serbe.
