Tre deputetët e Lëvizjes Vetëvendosja janë liruar nga paraburgimi.
Lirimi i tyre vjen një ditë pas arrestimit të Albin Kurtit, Albulena Haxhiut dhe Donika Kadaj-Bujupi, teksa deputetët i ishin drejtuar Kuvendit.
Dje deputetëve në fjalë iu dha masa e paraburgimit prej 30 ditësh. Deputetët u arrestuan nga Policia e Kosovës pas një urdhër-arresti të lëshuar nga gjyqtari Beqir Kalludra për rastin e gazit lotsjellës që u hodh para një viti në Kuvend. Kalludra u caktoi deputetëve paraburgim, për shkak të mosparaqitjes së tyre në seancën gjyqësore ndaj hedhjes së gazit lotsjellës.
Kurti, Haxhiu dhe Kadaj, akuzohen për hedhjen e gazit lotsjellës në Kuvendin e Kosovës gjatë seancave të vitit të kaluar, kur tentohej të bllokohej ratifikimi i marrëveshjes së Demarkacionit me Malin e Zi dhe ngritja e Asociacionit të komunave me shumicë serbe, sipas marrëveshjes së dalë nga dialogu me Beogradin.
Lidhur me arrestimin e deputetëve ka reaguar edhe kreu i Lëvizjes Vetëvendosje, Visar Ymeri, i cili e ka cilësuar aktin një brutalitet:
“Kjo është vazhdimësi e veprave të pushtetit, pas dënimit të aktivistëve tanë padrejtësisht. Është e njëjta klikë e pushtetit, e cila po synon që ta dhunoj votën e lirë të qytetarit, pas vendimit të djeshëm të PZAP-it dhe që po tentojnë të përndjekin secilin aktivistë të Vetëvendosjes”, tha Ymeri.
