Në shumë bare, kafene dhe lokale nate prija e duhanit në ambientet e brendshme është një realitet i përditshëm që duket se nuk i trembet ligjit, pavarësisht se ky i fundit e ndalon konsumin e tij në mjediset e mbyllura.
Nga një vëzhgim në terren duket qartë se duhani pihet lirshëm brenda ambienteve të mbushura me njerëz, ndërkohë që askush nuk ndërhyn për ta ndaluar këtë shkelje. Situata është edhe më shqetësuese në lokalet e natës. Qytetarët dhe punonjësit po ekspozohen kështu çdo ditë ndaj tymit të duhanit me pasoja në shëndet.
“E ndalon ligji, por nuk e zbaton njeri. Pikërisht dje, disa çuna në qefin e vetë na e sollën sikur e pimë ne”, raporton një qytetare. “Sidomos moshës tonë njëherë nuk i bën mirë”, thotë një qytetar. “Tmerr i vërtetë. E kishim një që na e bënte kafen e mirë, por e kemi lënë vetëm nga duhani”, thotë një qytetare tjetër. “Po patjetër që na shqetëson, Këtu nuk po pyesin për ligj. Po pinë jashtë edhe brenda duhanin”, shprehet një qytetar.
Eksperti i shëndetit publik, Roland Shuperka thotë se ka abuzime sidomos nga lokalet që pretendojnë se po e lejojnë duhanin në mjedis të hapur, pavarësisht se çdo ambient i rrethuar me xham apo plastmas konsiderohet i mbyllur. “Të gjitha ato ambiente që pretendohet se janë të hapura, të gjitha janë në kundërshtim me ligjin dhe quhen ambiente të mbyllura. Tymi i duhanit është ai që krijon dhe shkakton sëmundje të ndryshme në organizmin e njeriut”, shprehet Roland Shuperka, ekspert i shëndetit publik.
Inspektorati Shtetëror Shëndetësor pohon se për vitin 2024 janë vendosur vetëm 72 gjoba ndaj subjekteve që kanë lejuar pirjen e duhanit në ambiente të mbyllura. Krahasuar me vitet e mëparshme ka një rënie të gjobave. Megjithatë situata në terren tregon të kundërtën. Për t’i dhënë zgjidhje kësaj problematike kërkohet një zbatim më i drejtë i ligjit. “Vendosja e gjobave të larta që kishin shumë përzemër çoi në dështimin e implementimit të këtij ligji. Duhet një tavolinë e rrumbullakët, të dëgjohen të gjithë aktorët”, thotë eksperti Shuperka. Për vitin e shkuar sipas Inspektoratit Shtetëror Shëndetësor janë kryer 5 714 inspektime për monitorimin e zbatimit të ligjit antiduhan.
