“Qytetarët e Kosovës e meritojnë lëvizjen pa viza, sepse Prishtina i ka përmbushur kushtet e vendosura”, kështu ka deklaruar raportuesja për liberalizimin e vizave në Parlamentin Evropian, Tanja Fajon.
Kjo e fundit u shpreh se është e zhgënjyer nga mungesa e vullnetit për liberalizimin e vizave për kosovarët, ndërsa kërkoi nga institucionet e Kosovës që kërkesat e tyre t’ua drejtojnë më drejtpërdrejt vendeve anëtare, e jo thjesht institucioneve të BE-së.
“Qytetarët e Kosovës e meritojnë liberalizmin e vizave, sepse ata e kanë bërë punën e tyre. Ne si institucione të Bashkimit Europian kemi bërë shumë presion te kosovarët, që ata të përmbushin kërkesat dhe ata e bënë një gjë të tillë, të cilën Komisioni e ka pranuar. Sa u përket institucioneve europiane, Prishtina e ka ‘dritën e gjelbër’. Tani është në dorën e qeverive të vendeve anëtare”, tha Fajon gjatë një paneli të Konferencës “BE dhe Ballkani Perëndimor”, të organizuar nga “think tank”-u “Friends of Europe”.
Po ashtu, Fajon iu referua Gjermanisë dhe Francës si vendi kyce ku procesi i liberalizimit është bllokuar. Prandaj, ajo tha se tha në emër të Parlamentit, së bashku me europarlamentarin Kukan do të shkruajnë një letër, përmes së cilës do të kërkohet nga vendet anëtare që të kalojnë liberalizimin e vizave për kosovarët.
