Qendërsulmuesi i Bayernit të Mynihut, Robert Lewandowski, i cili mungoi në sfidën e parë kundër Realit të Madridit, ka folur rreth ndeshjes së kthimit, ku ekipi i tij do të vizitojë Santiago Bernabeon. Ai akoma nuk e ka harruar mbrëmjen kur luante me Borussian e Dortmundit, dhe shënoi 4 gola brenda një ndeshjeje kundër Realit të Madridit
Teksa u pyet nga “Marca”, polaku tha: “Kemi 6 ditë para dhe besoj se janë të mjaftueshme për t’u kthyer në formë. Nuk do të jem i gatshëm për ndeshjen e fundjavës, pasi le ta pranojmë, mendja na rri te Reali i Madridit. Të mërkurën ata treguan fuqitë e tyre. Ata janë me të vërtetë të frikshëm dhe këtë e tregoi përmbysja. Por, ju siguroj që unë do jem aty, do të jem në Bernabeo dhe do të tentojmë përmbysjen e madhe”.
Bayerni i tij, në ndeshjen e parë, lëshoi vetëm 2 goditje në kuadrat dhe me këtë numër goditjesh vështirë se do cenojnë kualifikimin e Realit. Kjo do të thotë se Bayerni duhet t’i bëjë llogaritë mirë para se të zbresë në Bernabeo, pasi aty është mbretëria ku kampionët e botës nuk mposhten prej 2 vitesh.
