Chase Carey ka ndalur të flasë për ndryshimet që priten të ndodhin në Formula 1, pas përfundimit të kontratave aktuale që kanë skuderitë. Formula e re që do të përdoret do të ulë diferencat mes makinave në pistë dhe do të jetë një kopeticion më i konkurueshëm dhe pa shpenzime marramendëse. Pavarësisht kritikave që kanë ardhur nga skuadrat kryesore të Formula 1, si Ferrari, Mercedes dhe Renault, pronari i Formula 1, ka deklaruar se ky sport do të pësojë një ndryshim rrënjësor në të ardhmen.
Nga viti 2021 pritet që të ndodhin ndryshime rrënjësore sa i përket motorrave që o të përdoren edhe pse nuk do të jenë të gjitha të një niveli,por ky është vetëm fillimi i bisedimeve që do të zgjasin shumë, pasi Ferrari ka paralajmëruar se mund të tërhiqet nëse do të ndodhë kjo gjë. Këto ndryshime numri një i Formula 1, ka vendosur ti hedhë në diskutim, për të sjellë një model të ri biznesi dhe për të mos u larguar investitorët duke thënë se ky sport kushton shumë.
“Në të shkuarën, secili ka punuar për interesin e tij dhe se si të mundë tjetrin. Ne duam më shumë rivalitet në pistë, por duke marrë një miratim të gjerë. Natyrisht që diferencat mes makinave do të jenë ende, por për ne të gjitha skuadrat janë të rëndësishme. Sot ka skuadra që shpenzojnë gjysmë miliardi për të sjellë në pistë një apo dy makina dhe kjo nuk sjell asnjë vlerë te tifozët. Duhet të gjejmë nisma që ulin kostot e motorëve dhe aerodinamikës”, tha Carey, që shtoi se do të adaptojë një model të ri të të bërit sport: “Ne duam të sjellim një model biznesi, që të favorizohen e fitojnë të gjitha skuadrat, për të favorizuar hyrjen e aktorëve të rinj në këtë sport. Nuk duam që investitorët të mos largohen duke thënë se Formula 1 kushton shumë”.
