Pasi dështoi të futej në Parlament përmes një koalicioni me Endrit Shabanin në zgjedhjet e 11 majit dhe përplasjeve me këtë të fundit, ku u përfshinë edhe tezet dhe dajat, Adriatik Lapaj i është rikthyer protestave.
Ditën e djeshme, dy orë pasi në bulevard përballë zyrës së kryeministrit Rama ishin larguar demokratët me foltoren e tyre, Lapaj mori një karrige dhe u ul afër shkallëve të godinës, ku njoftoi një protestë të pandërprerë dhe ku shpresonte që çdo ditë do ti bashkoheshin qytetarët.
“Do thoni çfarë bën në këtë orë te kryeministria? Sot nis një protestë, do të jem këtu ditë natë pa ndalim, jo duke ikur në shtëpi, jo duke ngrënë dreka e duke dale në televizion”, premtoi Lapaj.
E megjithatë protesta e tij full-time, rezultoi që ditën e parë të ishte part-time. Mesditën e sotme, pasi bëri një video në mëngjes dhe një foto me disa nga anëtarët e partisë së tij që iu bashkuan, Lapaj u largua nga kryeministria me premtimin se do të rikthehet sërish në orën 17:00.
“Në orën 5 pasdite sot do të mblidhemi këtu çdo ditë. Ishte pak ftohtë sot, por jo e papërballueshme. Duhet një shkëndijë për ta ndezur reagimin popullor”, deklaroi Lapaj që e nisi si në protestë pa ndërprerje, por që ditën e parë u detyrua të largohej për disa orë.
