Blutë e Vlorës kanë bërë të mundur identifikimin e autorëve, në lidhje me një ngjarje të ndodhur një vit më parë. Rasti në fjalë është shënuar në 15 shtator, në afërsi të fshatit Mazhar, ku dy persona të moshës 36 dhe 43 vjeç, kanë vjedhur me armë zjarri shtetasin me inicialet D.H., nga Samatica e Beratit, i cili ka qenë duke udhëtuar me automjetin “Benz”.
Nga kryerja e veprimeve hetimore e proceduriale, janë siguruar prova ligjore të cilat kanë identifikuar si autor të dyshuar Lulzim Demiraj, 43 vjeç, banues në Vajzë, Vlorë dhe Zini Fyraj, 36-vjeç, banues në Sevaster, Vlorë.
Të dy këta shtetas ndodhen duke vuajtur dënimin “Arrest me burg”, në IEVP Fier, për veprën penale “Vjedhje me armë, kryer në bashkëpunim”.
Ata janë autor të vjedhjes së këmbimit valutor në Fier, ngjarje e ndodhur në mars të këtij viti, ku mbeti i vrarë Agur Vrenozi, i cili ndërhyri të ndihmojë pronarin e pikës së këmbimit.
Njoftimi i policisë
Strukturat Policore të Seksionit për Hetimin e Krimeve ndaj Personit dhe Pronës, në vijim të hetimeve të kryera për zbardhjen e ngjarjeve të ndryshme, kanë bërë të mundur dokumentimin me prova ligjore të një vjedhje me armë zjarri.
Ngjarja ka ndodhur më datë 15.09.2017, në afërsi të fshatit Mazhar, ku dy persona kanë vjedhur me armë zjarri shtetasin D.H., banues në Samaticë, Berat, i cili ka qenë duke udhëtuar me automjetin “Benz”.
Nga kryerja e veprimeve hetimore e proceduriale, janë siguruar prova ligjore të cilat kanë identifikuar si autor të dyshuar shtetasit:
L.D., 43-vjeç, banues në Vajzë, Vlorë.
Z.F., 36-vjeç, banues në Sevaster, Vlorë.
Aktualisht dy shtetasit e mësipërm ndodhen duke vuajtur dënimin “Arrest me burg”, në IEVP Fier, për veprën penale “Vjedhje me armë, kryer në bashkëpunim”, parashikuar nga neni 140 e 25 të Kodit Penal.