Qeveria greke aprovoi të hënën (19 nëntor 2018), dy licencat e para për kultivimin dhe procesimin e mëtejmë të kanabisit, për qëllime medicinale. Po kështu qeveria lajmëroi se deri në fund të vitit, do të lëshojë edhe 12 licensa të tjera.
“Ka interes shumë të madh, sidomos nga Kanadaja dhe Izraeli… disa nga ata janë investitorë të fuqishëm…”, tha Zëvendësministri i Ekonomisë, Stergios Pitsiorlas, në një konferencë për shtyp.
Pitsiorlas tha gjithashtu se sasitë e para të kanabisit medicinal, do të jenë në treg pas një periudhe prej 12-18 muajsh, që të gjitha me qëllim për t’u eksportuar.
Dy licencat e para ju dhanë kompanive Biomecann dhe Bioprocann, me qendra, respektivisht në Larisa dhe Korinth, të cilat kanë parashikuar të investojnë 22 milionë euro dhe të hapin 100 vende të reja pune.
Licencat kanë një kohëzgjatje pesë-vjeçare, por do të rishikohen çdo vit. Licencat e parashikuara të jepen deri në fund të këtij viti është përllogaritur se do të çlirojnë investime në shifrën totale 185 milion euro, dhe se do të hapin 750 vende të reja pune. Greqia e legalizoi prodhimin e kanabisit medicinal vitin e shkuar, dhe rregulloi me ligj kultivimin dhe prodhimin në muajin mars të këtij viti. TIRANA TODAY
