Banorët e “Lagjes së Re” në Kukës vijojnë të përballen me infrastrukturë të degraduar, duke jetuar mes baltës, gropave të mbushura me ujë dhe rrugëve të pakalueshme sa herë që ka reshje shiu apo dëbore. Ata shprehen të revoltuar, duke kërkuar ndërhyrje urgjente nga bashkia dhe qeveria për asfaltimin e rrugëve, pasi situata është e njëjtë prej vitesh.
Më të prekur nga kjo gjendje janë fëmijët, të cilët çdo ditë e kanë të vështirë të shkojnë në shkollë apo kopësht. Disa prej tyre tregojnë se janë të detyruar të ecin mes baltës, ndërsa prindërit dhe gjyshërit shpesh i mbajnë në krah për t’i ndihmuar të kalojnë.
Nga ana tjetër, Bashkia e Kukësit ka deklaruar se lagjja është përfshirë në projektet e rehabilitimit dhe pritet të ndërhyhet gjatë këtij viti. Megjithatë, për banorët e “Lagjes së Re”, pritja ka qenë e gjatë dhe ata kërkojnë që premtimet të kthehen në veprime konkrete sa më shpejt.
