Shqipëria, një vend që zyrtarisht vijon të paraqitet si “kandidat model” për anëtarësim në Bashkimin Europian, është sot në qendër të vëmendjes botërore jo për reformat, por për skena të denja për shtete të botës së tretë.
Ngjarjet e ndodhura në Parlamentin shqiptar, me fishekzjarre, përplasje fizike, shishe uji dhe akuza për diktaturë, janë pasqyruar gjerësisht në mediat ndërkombëtare, duke e ekspozuar krizën e thellë institucionale që po kalon vendi.
Reuters, Fox News, WTOP News, AP dhe agjenci të tjera të njohura kanë raportuar në kohë reale për përplasjet e dhunshme mes deputetëve të opozitës dhe forcave të sigurisë në Kuvend. Flakadanët u ndezën në podium, shishet u hodhën ndaj kryetarit të Kuvendit, Niko Peleshi, dhe ulëset e kabinetit qeveritar u uzurpuan nga opozita për të penguar punimet e seancës.
Sipas “Reuters”, incidenti shpërtheu gjatë seancës për zgjedhjen e Avokatit të Popullit, ndërsa opozita e Partisë Demokratike akuzoi qeverinë socialiste për “manipulim zgjedhjesh” dhe “zënie peng të demokracisë”.
“Protestuesit mbanin pankarta ku kryeministri Edi Rama krahasohej me diktatorin panamez Manuel Noriega, duke e quajtur “Noriega i Europës””, shkruan “Associated press”.
“Në qendër të krizës ndodhet Zëvendëskryeministrja Belinda Balluku, ndaj së cilës SPAK ka lëshuar urdhër-arrest për korrupsion në tenderë publikë me vlera marramendëse, për projekte si tuneli i Skraparit dhe Unaza e Tiranës. SPAK ka kërkuar heqjen e imunitetit parlamentar, ndërsa mazhoranca ende nuk ka lejuar votimin. Balluku i ka mohuar akuzat, duke i cilësuar “shpifje dhe insinuata””, shkruajnë mediat e tjera.
Fox News, në një analizë të thelluar, citon ish-ambasadorin Agim Nesho, i cili e konsideron situatën si “kapje të plotë të shtetit nga një regjim klientelist që mbron të korruptuarit në vend që të lejojë drejtësinë të veprojë”.
WTOP News thekson se deputetët opozitarë kërkojnë transparencë për akuzat ndaj Ballukut dhe paralajmërojnë përshkallëzim të protestës nëse shumica vazhdon të bllokojë drejtësinë.
Ngjarjet vijnë në një moment të ndjeshëm për Shqipërinë, e cila aspiron të hapë kapituj të rinj në negociatat me BE-në. Por skenat e kaosit, dhunës fizike dhe mungesës së civilizimit politik përbëjnë një goditje të fortë ndaj çdo imazhi të një shteti europian funksional. /Pamfleti
