Pak minuta para mesnatës, KQZ-ja bëri të ditur se ka përfunduar numërimi i votave të partive në të gjithë Shqipërinë, ndonëse në faqen zyrtare janë pasqyruar vetëm 5209 nga 5225 kuti.
Sipas shifrave zyrtare të raportuara nga Komisioni Qendror i Zgjedhjeve, votat në çdo qark të përkthyera në mandate, japin një tablo ku Partia Socialiste kryeson thellë me numër mandatesh.
Kështu socialistët kanë marrë tjetër mandat në Vlorë duke shkuar në 83 mandate, ku rezultatin më të mirë e kanë në Tiranë, Fier, Durrës, Elbasan dhe Vlorë.
Koalicionit të kryesuar nga Partia Demokratike i kanë ikur dy mandate, ai i Vlorës dhe një në Tiranë që ia mori partia Mundësia e Agron Shehajt. Kështu koalicioni PD -ASHM ka zbritur në 50 mandate, ndërsa Mundësia 2 mandate.
Sa i përket partive të tjera, PSD-ja e Tom Doshit është forcë e tretë politike në Kuvend me 3 mandate, koalicioni “Nisma Shqipëria bëhet” ka 1 mandat, ndërkohë Lëvizja Bashkë 1 mandat.
Partia Socialiste renditet e para me mbi 251 mijë vota më shumë se Partia Demokratike, duke mos përfshirë këtu votat e Diasporës, të cilat pritet të numërohen gjatë ditës së sotme, ku dhe do të bëhet dhe mbyllja totale e 12 kutive të votimeve që kanë mbetur pa u mbyllur.
NUMERIMI I VOTAVE TE DIASPORES
Sipas të dhënave më të fundit të publikuara nga Komisioni Qendror i Zgjedhjeve, deri në këtë moment janë numëruar 79,409 zarfe nga gjithsej 194,889 që janë dorëzuar. Rezultatet paraprake tregojnë një avantazh të ndjeshëm të Partisë Socialiste, e cila kryeson me 42,492 vota, që përbëjnë 53.97% të totalit të votave të numëruara deri tani.
Në vendin e dytë renditet Koalicioni Partia Demokratike – Aleanca për Shqipërinë Madhështore (PD-ASHM) me 22,481 vota ose 28.55%. Të dhënat e detajuara të rezultateve paraprake nga KQZ janë si më poshtë:
Partia Socialiste e Shqipërisë (PS) – 42,492 vota
Koalicioni PD-ASHM – 22,481 vota
Koalicioni Nisma Shqipëria Bëhet (NISMA-SHB) – 6,670 vota
Partia Mundësia – 2,781 vota
Lëvizja Bashkë – 2,067 vota
Partia Socialdemokrate (PSD) – 880 vota
Partia Koalicioni Euroatlantik (KEA) – 546 vota
Partia Aleanca Kombëtare Shqiptare (AKSH) – 457 vota
Koalicioni Djathtas për Zhvillim (DZH) – 207 vota
Lëvizja Atdheu (LA) – 108 vota
Partia Aleanca Demokracia e Re (ADR) – 40 vota
