Prokuroria e Posaçme ka filluar të vërë para bosët e krimit dhe të korruptuarit në politikë. Disa vite më parë prokurorët druheshin para tyre, por tani po ndodh e kundërta.
Përveç arrestimeve të bujshme në politikë, SPAK ka zhvilluar disa operacione të rëndësishme ndaj botës së krimit, duke shënjestruar emra që për vite me radhë kanë terrorizuar vendin.
Por shumë prej tyre kanë arritur t’ia hedhin paq, duke i shpëtuar arrestimit.
Po ashtu kanë dalë në publik të dhëna sensitive. Në shumë raste SPAK u është hakërryer mediave, duke i kërcënuar gazetarët me burg nëse nxjerrin të dhëna hetimore. Madje përndjekin ende Elton Qynon. Në disa raste është hapur hetim nga vetë SPAK për nxjerrje të sekreteve hetimore, por dhe deri më tani nuk kemi asnjë funksionar brenda Strukturës të ndëshkuar, vetëm persona të tretë.
Vetë SPAK në një reagim zyrtar shprehet se gjatë vitit aktual ka regjistruar vetëm 3 procedime për veprën penale “Zbulimi i akteve ose të dhënave sekrete”, parashikuar nga neni 295/a i Kodit Penal.
“Pas verifikimeve të kryera në regjistrin e njoftimit të veprave penale të Prokurorisë së Posaçme, në lidhje me procedimet penale të regjistruara për veprën penale “Zbulimi i akteve ose të dhënave sekrete”, parashikuar nga neni 295/a i Kodit Penal, gjatë periudhës 2020 – shtator 2024, ju informoj se janë regjistruar gjithsej 12 procedime penale, të ndara në viteve, si më poshtë vijon: Për vitin 2020, janë regjistruar 2 procedime penale; Për vitin 2021, është regjistruar 1 procedim penal; Për vitin 2022, është regjistruar 1 procedim penal; Për vitin 2023, janë regjistruar 5 procedime penale; Për vitin 2024, janë regjistruar 3 procedime penale”, thekson SPAK.
Një ndër 3 personat është ish-deputeti i PS, Jurgis Çybja. Ai siguronte të dhëna nga hetimet apo operacionet e policisë dhe prokurorisë, e më pas informonte grupet kriminale. SPAK ka siguruar shumë prova dhe përgjime që tregojnë se si ai bashkëpunonte me bandat në Shijak.
Por ajo që nuk dimë është se si ka pasur ai akses në këto të dhëna sekrete? Kush ja siguronte. Ajo që vihet re është se vetë SPAK e ka të vështirë ta zbulojë. Deri më sot asnjë prokuror apo punonjës i SPAK nuk është ndëshkuar për një vepër të tillë.
