Sëmundjet që prekin mëlçinë po kthehen në një shqetësim madhor në mbarë globin. Miliona njerëz vuajnë nga këto sëmundje, disa prej të cilave vdekjeprurëse, të cilat në shumë raste mund të shmangen falë ndryshimeve në stilin e jetesës. Mëlçia, si çdo organ tjetër, është një shënjestër e lehtë e toksinave dhe kimikateve që na rrethojnë çdo ditë.
Natyrshëm, ky organ ka nevojë për ndihmë që të pastrohet prej toksinave dhe organizmave të rrezikshëm, prania e të cilëve vë në rrezik edhe trurin. Një nga përbërësit kryesorë të të gjitha kurave për pastrimin e mëlçisë është vaji i ullirit. Mëlçia luan një rol qendror në detoksifikimin e trupit dhe kryen një sërë detyrash dhe funksionesh, duke nisur që nga prodhimi i proteinave, kolesterolit, ruajtjes së vitaminave, mineraleve dhe karbohidrateve. Ajo shpërbën toksinat që shoqërojnë alkoolin, ilaçet apo nënproduktet natyrale të metabolizmit.
Vaj ulliri
Mbajtja në formë e mëlçisë është tejet e rëndësishme për shëndetin. Vaji i ullirit ofron shumë vlera të shëndetshme, një prej tyre është pastrimi i mëlçisë. Sipas studimeve, pirja e vajit të ullirit e ndihmon mëlçinë të përshpejtojë përpunimin e çdo substance. Ai ndihmon edhe në largimin e substancave të dëmshme të ngecura në organ sa më shpejt. Vaji natyral i ullirit është kura më e mirë për mëlçinë, por në përzgjedhjen e tij duhet të tregoheni të kujdesshëm.
Është e rëndësishme që të përzgjidhni vajin e nxjerrë nga ullinj të përpunuar sa më pak dhe të nënshtruar një presimi të ftohtë. Vaji ekstra i virgjër i ullirit është ai që nuk është nxjerrë nga një presim i nxehtë i ullinjve apo që nuk përmban kimikate. Freskia është një aspekt i rëndësishëm në përzgjedhjen e vajit të ullirit. Vaji i ullirit nuk duhet të qëndrojë i papërdorur për shumë kohë. Vajrat që nuk konsumohen brenda dy viteve nga data e prodhimit nuk janë të shëndetshëm.
Kura tre-ditore e pastrimit të mëlçisë
Kura e mëposhtme zgjat tri ditë dhe duhet bërë në mbrëmje përpara se të bini për të fjetur. Këshillohet që të përzieni në një mikser gjysmë gote me vaj ulliri dhe gjysmë gote me lëng të freskët limoni. Pijeni lëngun menjëherë dhe shtrihuni në shtrat, qëndroni shtrirë me gjunjët të mbështetur mbi kraharor për 30 minuta. Kjo kurë duhet shoqëruar me konsumin e mollëve dhe lëngjeve të saj, të cilët gjithashtu kanë efekt pastrues./Marrë nga Gazeta Shqiptare
