Veliaj nuk ka të ndalur me betonizimin e vendit, me talljen e marrjen nëpërkëmb të artistëve, e tashmë është i plotfuqishëm që të fusë brenda qelisë çdokënd që ia prek këmishën.
Por kjo bie ndesh me një realitet të trishtë që përballemi çdo ditë, e cila ka të bëjë me atë që PD e LSI e cilëson si narko-shtet, e ku klasa politike luan si “macja me miun”, dhe ia hedhin paq drejtësisë.
Këtu ndryshon puna, se kur i cënohen interesat lali Erit, atij i erren sytë dhe e fut brenda në qeli atë që tenton ta bëjë gazin e botës.
Pas zhurmës që u krijua një ditë më parë, i riu që qëlloi kreun e Bashkisë me vezë është proceduar penalisht.
Reagimi i policisë
"Më datë 14.06.2018, u referuan materialet në Prokurorinë pranë Gjykatës së Shkallës Parë Tiranë, dhe po punohet për shoqërimin e shtetasit O. G., 21 vjeç, banues në Tiranë, pasi rreth orës 10:50, në rrugën "28 Nëntori", për shkak të detyrës ka qëlluar disa herë me vezë në drejtim të kryetarit të Bashkisë, shtetasit E. V. Neni 237 i Kodit Penal”.
Dita e djeshme ka qenë mjaft e tensionuar, e në sinkron të plotë aktorët e kanë cilësuar Teatrin Kombëtar si një vend të shenjtë.
Me mbështetjen e qeverisë qendrore, Erion Veliaj ka pasur më shumë arritje sesa Lulzim Basha si kryebashkiak i Tiranës. Ai është shfaqur shpesh në TV duke mbjellë pemë, por ka lejuar betonizimin e mëtejshëm të Tiranës me kulla shumëkatëshe.
Policia e tij bashkiake, ka përndjekur tregtarët varfanjakë të rrugës, ndërsa nuk ka toleruar shkeljet e bizneseve të mëdha. Dje u tentua të qëllohej me vezë nga aktivist i PD. Veliaj tentoi të kalonte këtë incident me humor, duke ironizuar me mungesën e shënjestrës.
Vezët janë një mjet i protestës qytetare ndaj politikanëve të kontestuar dhe Veliaj është njeri prej tyre.
