Eduard Selami mbrëmë shpalli kandidaturën e tij për kryetar të Partisë Demokratike duke thënë se do të sjellë mendimin amerikan në parti. Nuk duhet harruar fakti së ai ka qenë një ndër themeluesit e kësaj partie me kontribute si në fillim të viteve ‘90-të por dhe katër vitet e fundit kur ky u kthye në Shqipëri dha mbajti mandatin e deputetit.
Ndoshta shumë pak njerëz e kujtojnë se çfarë idesh kishte dhe se çfarë shkruante në sistemin komunist dhe si i drejtohej diktatorit Hoxha. Materiali është publikuar në Facebook, nga aktivisti i hershëm i Partisë Demokratike për qytetin e Librazhdit, Kujtim Cekani.
Pas një kërkimi të thjesht në katalogun online të Bibliotekës Kombëtare mësohet se këtë punim Selami e ka shkruar në kuadër të marrjes së gradës shkencore ‘‘Kandidat i shkencave’’.
Ja se çfarë shkruan Selami në artikullin e tij për diktatorin
Mendimi estetik i shokut Enver Hoxha, kontribut i rëndësishëm në pasurimin e estetikës sonë
“Mendimi estetik i shokut Enver Hoxha është një kontribut me vlera te shumanshme dhe zhvillim i mëtejshëm krijues i estetikës Marksiste-Leniniste. Zgjidhja e problemeve të reja e të larmishme që ka shtruar procesi i zhvillimit të artit te realizmit socialist, duke u mbështetur në parimet, metodologjinë e ligjësitë e estetikës sonë qëndrojnë në themel të këtij karakteri krijues.
Ky mendim ka ndjekur hapa pas hapi dhe njëkohësisht i ka paraprirë procesit të gjallë krijues të zhvillimit të artit tonë të realizmit socialist, ai është një përgjithësim teorik i problemeve që ka shtruar kjo praktikë dhe i ka hapur asaj horizonte të reja krijuese. Shqyrtimi dhe analiza e fakteve konkrete kanë qene shtysë e meditimeve, ideve, konkluzioneve e përgjithësimeve shkencore, direktivave e orientimeve të rëndësishme për zhvillimin e artit tonë.”
