Ekipet shqiptare që luajnë sonte takimet e tyre europiane
20:30 Podgorica-Laçi
18:00 Ferencvarosh- Prishtina
20:00 Shkëndija-Mura
Ekipet shqiptare të shpërndara nëpër kampionate të ndryshme të Ballkanit luajnë turin e parë para-eliminator të kupave europiane duke nisur nga sot. Sonte 3 prej tyre ngrenë siparin e futbollit të “zhegut”. Laçi, Shkëndija dhe Prishtina vijnë nga histori të ndryshme deri këtu.
Champions League
Prishtina luan turin e parë në Champions, turneu më prestigjoz për klube, pasi eleminoi dy skuadra të rangut të vet në një minikompeticion me 4, që u luajt, në Shqipëri. Prishtinalinjtë mundën Folgoren e San Marinos dhe Inter Escalade të Andorrës për të siguruar përballjen e nivelit të lartë me Frenecvaroshin e Myrto Uzunit. Kundërshtari më i vështirë i mundshëm ky për kryeqytetasit e Prishtinës, pasi hungarezët, kampionë në vendin e tyre, luajtën grupet e Championsit sezonin që sapo u mbyll, ku madje patën paraqitje dinjitoze ndaj ekipeve si Barcelona apo Juventus (Myrto Uzuni madje u shënoi juventinëve një gol të bukur). Pritshmëritë për kalim turi mund të jenë thuajse zero por padyshim një eksperincë e tillë ndihmon shumë si në rritje sportive ashtu dhe në krijimin e një trashëgimie.
Shkëndija është tashmë një emër i afirmuar në “këto” raunde para-eliminatore në botën shqiptare. I disati sezon rradhazi që tetovarët paraqiten denjësisht në arenën europiane që ka kulmuar me përballjet ndaj Milanit dhe Totenhemit. Sonte ata presin në shtëpi Murën, ekipin e kampionatit slloven që doli kampion dhe pse e mbylli me pikë të barabarta me Mariborin. Tetovarët presin një tjetër aventurë europiane “magjike”, që supozohet të nisë sot me një fitore që pritet dhe nga “bookmakers”at që e kuotojnë fitoren e Shkëndijës me 2.60 karshi 2.80 të fitores së Murës.
Conference League
Laçi do të jetë skuadra e parë e Superligës Shqiptare që do të luajë në Europë për këtë sezon. Laçianët udhëtojnë drejt Podgoricës me shpresën se do ta gjejnë të papërgatitur skuadrën malazeze. Podgorica kuotohet si ekipi favorit për sonte, por Laçi ka treguar se shfaqet si ekip “kirurgjikal” në ndeshjet europiane. Me shumë ndryshime në skuadër kurbinasit do të japin shenjat e para për të gjithë sonte, pasi nuk dihet ende se si pritet të rreshtohet skuadra veriore në sezonin e ri. Trajneri Duro është shprehur se “ekipi është në gjendje të mirë” dhe shikon “pozitiv faktin që nuk ka pasur asnjë dëmtim” gjatë fazës përgatitore. Fitorja e Laçit sonte kuotohet me 3.90, çka tregon shanse të pakta por kujdes pasi kurbinasit shpeshherë e nisin si të “pafavorizuar” dhe në fund ia kanë dalë. Laçi do të ketë vetëm një mungesë për shkak kartonësh nga sezoni i kaluar, Deliun që u ndëshkua me të kuq në ndeshjen e fundit europiane që luajtën bardhezinjtë, vjet në shtator, ndaj Beer Shevas./Totila Kotorri
