Ministrja e Kulturës, Mirela Kumbaro, e ka cilësuar qytetin e Përmetit si një pikë të rëndësishme turistike.
Sipas saj, ky qytet është një konstelacion destinacionesh, që ndodhen në hartën e zonës, dhe që duhet të jenë edhe në hartën dhe ofertën turistike.
Kumbaro është shprehur se qyteti i Përmetit nuk njihet veç për rakinë e glikotë.
Ajo është ndalur veçanërisht në fshatin Bënjë, që në janar të këtij viti u shpall qendër historike dhe u përfshi në programin e zhvillimit që qeveria shqiptare ka me Bankën Botërore.
“Bënja është fshati që e shpallëm Qendër historike në janar të vitit 2017 dhe që është përfshirë në programin e zhvillimit që Qeveria shqiptare ka me Bankën Botërore. Filluam restaurimin e Kishës së Shën Mërisë ku ka shumë histori, që nga legjenda e ikonës së Shën Mërisë, deri te spitali partizan e bënjotët të vrarë nga nazistët, por edhe pelegrinazhi i datës 21 nëntor kur Bënja është qendra e përmetarëve”, është shprehur Kumbaro.
