Kryetari i Partisë Demokratike, Lulzim Basha, ka reaguar menjëherë pas reagimit të bërë nga kryeministri Edi Rama mëngjesin e sotëm, lidhur me ndërtimin e kullës “Mali i Tiranës” si dhe me akuzat e ngritura.
Përmes një postimi në “Facebook”, Basha i drejtohet kryeministrit Rama duke i thënë se zgjidhja është e thjeshtë për të ndarë të vërtetën nga balta, vettingu në politikë, të cilën Partia Demokratike e ka propozuar shumë herë.
“Meqë mali i korrupsionit në qendër të Tiranës i duket si një “mullar balte”, ka një zgjidhje shumë të thjeshtë për të ndarë të vërtetën nga balta: Veting në politikë”, shkruan Basha.
“Sa më shumë zgjatet lista e bashkëpunëtorëve të tij të ngushtë që janë në burg, arrati apo nën hetim për shkak të makutërisë me të cilën është mbrujtur qeverisja e tij, aq dhe më të gjata bëhen hartimet e Ramës. Por atë që nuk e thotë dot me pak fjalë, nuk ka shans ta mbulojnë fjalët shumë e për lumë.
Meqë mali i korrupsionit në qendër të Tiranës i duket si një “mullar balte”, ka një zgjidhje shumë të thjeshtë për të ndarë të vërtetën nga balta: Veting në politikë.
Kur është i mirë për gjyqtarët, prokurorët, policët, pse të mos jetë i tillë edhe për politikanët?!
Propozimi i Partisë Demokratike është në Parlament, mjafton vullneti politik për ta miratuar. Me këtë rast u kursejmë qytetarëve andrallat e njëpasnjëshme të cirkut 33 vjeçar, pas të cilave fshihet frika nga e shkuara e atyre që ndonëse e kërkojnë votën për t’i shërbyer njerëzve, i kanë shërbyer vetëm interesave personale dhe klientelës oligarkike”, shkruan ndër të tjera kreu i PD-së.
