Triumfon Skënderbeu në “Zeqir Ymeri” përballë Kukësit kampion. Një ndeshje e luftuar fort nga të dyja skuadrat por që në fund janë korçarët që kurorëzohen me fitoren 1-2, si rezultat i lojës më të mirë që zhvilluan dhe e kërkuan më shumë fitoren. Nuk ka dyshim që ekipi i drejtuar nga Ilir Daja është më i kompletuari në Shqipëri, pasi po bën paraqitje të mrekullueshme edhe në përballje me ekipet e mëdha evropiane. Por edhe Kukësi është duke u ngritur cdo vit e më shumë. Në 8 përballjet e fundit duke përfshirë edhe ndeshjen e sotme, veriorët kanë fituar 4 herë, 2 ndeshje janë mbyllur barazim dhe 2 herë fiton Skënderbeu.
Sa i përket ndeshjes së sotme është Skënderbeu që dominon në pjesën më të madhe të lojës dhe tregon më shumë dëshirë për ta mbyllur ndeshjen në fitore. Kukësi shfaqi shumë optimizëm për këtë ndeshje, por në fushë ishte Skënderbeu që po shfaqej më mirë. Golin e parë e gjejnë miqtë me Ditën në të 31’-ën minutë, pas një stopimi mjaft të mirë në zonë dhe një goditje të fuqishme që mposht portierin Kolici. Kukësi reagon duke u hedhur në sulm dhe vetëm pas 5’ minutash fitojnë penallti e cila ekzekutohet nga Bakaj që barazon shifrat e për të mbyllur në baraspeshë pjesën e parë.
Fraksioni i dytë fillonte ritëm të lartë loje nga të dyja ekipet, por kuksianet tërhiqen disi mbrapa pasi Skënderbeu i Dajës merr në dorë kontrollin e lojës. Pas shumë rastesh të pa finalizuar në rrjetë korçarët në të 83’-ën fitojnë 11-metërsh i cili u ekzekutua nga Lilaj që nuk gabon dhe rikthen avantazhin për bardhekuqtë. Kukësi i Milinkovic nuk ka forcën për të reaguar dhe janë sërish miqtë që hidhen në sulm. Është Xhejms që pak para fundit godet nga jasht zone shumë fort, por Kolici këtë herë është i gatshëm edhe e ndal. Ndeshja mbyllet me rezultatin 1-2 në favor të korçarëve, rezultat i drejtë për atë që u pa në fushë. Skënderbeu me këtë firore mbanë kreun i vetëm dhe vazhdon me objektivin Superliga. /Tirana Today/
