Diego Armando Maradona ka qenë mjaft aktiv në ndeshjen mes Argjentinës dhe Nigerisë, madje duke dalë nga vetja pas shënimit të golit të dytë. “Albicheleste” u kualifikua mes 16 më të mirave falë golit të shënuar në minutat e fundit nga Marcus Rojo.
Por pas ndeshjes Maradona nuk qëndronte dot në këmbë dhe është larguar nga stadiumi duke u mbajtur në krah dhe mjekët e kanë vizituar menjëherë. Madje siç shihet në videon e publikuar në rrjetet sociale, ai mbahet për krahu dhe nuk arrin dot as të ulet në kolltuk.
Ai është dërguar në spital nga stafi mjekësor i stadiumit. Por pas ndihmës mjekësore Diego Armando Maradona ka treguar se është në gjendje të mirë shëndetësore. Maradona ka zbuluar se kishte dhimbje qafe dhe problem me zemër dhe se doktori i kishte rekomanduar të shkonte në shtëpi pas pjesës së parë.
“Dua t’ju them se jam mirë, se nuk jam në spital e as nuk jam shtruar më herët”, ka shkruar ai në llogarinë e tij në rrjetet sociale.
Maradona shtoi se nuk ka dashur ta dëgjojë rekomandimin e doktorit në mënyrë që të ishte dëshmitar i kualifikimit të Argjentinës në mesin e 16 skuadrave më të mira.
“Më kontrolloi doktori dhe më rekomandoi të shkoja në shtëpi pas pjesës së parë, por doja të qëndroja sepse po rrezikonim. Si të largohesha? Puthje për të gjithë, faleminderit për përkrahjen!”, shtoi ai. Fitorja e ka dërguar Argjentinën në 1/8 ku do të takohet me Francën.
