Kryepeshkopi i Shqipërisë Anastas Janullatos pas problemeve me shëndetin si pasojë e një viroze po trajtohet në një spital në Athinë.
Kisha Orthodhokse Autoqefale e Shqipërisë përmes një deklarate bën me dije se gjendja shëndetësore e Janullatos është stabël dhe po monitorohet nga mjekët.
DEKLARATA
Fortlumturia e Tij, Kryepiskopi Anastas, ishte i shtruar prej disa ditësh në një nga spitalet e Tiranës. Gjendja e tij paraqitej përgjithësisht e stabilizuar, por për diagnostifikim më të specializuar, mjekët sugjeruan të dërgohet jashtë dhe dje, më datë 3.01.2025, u dërgua në Athinë.
Sipas deklaratës së mjekëve të spitalit të Ungjillëzimit, në Athinë, ku po trajtohet, me gjithë historikun e tij të sëmundjeve të ndryshme, gjendja e tij shëndetësore është stabël dhe po ndiqet nga mjekët specialistë.
