Kryeministrja e Britanisë, Theresa May ka dalë në një konferencë për shtyp pas ngjarjes që tronditi Anglinë dhe jo vetëm.
May e cilësoi këtë ngjarje si një nga sulmet më të tmerrshme që ka përjetuar Anglia, ndërsa shtoi se autorët e sulmit do të përgjigjen para drejtësisë.
“Sulmi i mbrëmshëm ishte një sulm vetëvrasës i turpshëm dhe burracak.
Mendimet dhe lutjet tona shkojnë për familjarët dhe miqtë e të gjithë të prekurve nga ky sulm terrorist. Ky ishte një nga sulmet më të tmerrshme terroriste që kanë ndodhur në Mbretërinë e Bashkuar. Edhe pse kjo nuk është hera e parë që Manchesteri ka përjetuar sulme të tilla, ky është sulmi më i keq që qyteti ka përjetuar dhe më i keqi, i cili goditi Anglinë e Veriut.
Policia beson se e di identitetin e sulmuesit. Policia po heton nëse autori është ndihmuar nga të tjerë. Autorët e sulmit do të përgjigjen para drejtësisë”, tha kryeministrja May gjatë fjalës së saj.
Sulmi kamikaz ndodhi mbrëmë gjatë koncertit të këngëtares amerikane, Ariana Grande, ku mbetën të vdekur 22 persona dhe u plagosën të paktën 59 të tjera.
