Numërimi i kutive të para në rang kombëtar tregon qartë një diferencë të madhe mes PS-së dhe PD-së, ku kjo e fundit ka pësuar një rënie prej së paku 9 mandatesh krahasuar me zgjedhjet e 2013-ës, nga rezultatet e deritanishme.
Kështu, numërimi i votave deri më tani tregon se kemi të bëjmë me një tjetër mandat 4-vjeçar për Partinë Socialiste, gjë që ka gëzuar pa masë kryeministrin.
Ky i fundit nuk e ka fshehur ekzaltimin e fitores dhe rezultateve të deritanishme, të cilin e ka ndarë edhe me miqtë e tij në profilin e tij në Facebook.
Rama ka publikuar një video të hartës së Shqipërisë, e cila ngjyroset e gjitha me rozë, duke dëshmuar një fitore të PS-së.
“MIRËMËNGJES ?
dhe ju uroj një ditë të bukur me këtë kryevepër ende të pambaruar të njerëzve të zakonshëm të këtij vendi”, shkruan kryeministri, i cili ka shmangur një detaj.
Në fakt, rezultati i fitores së tij është i qartë, por qarku i Kukësit vazhdon të mbetet blu, edhe pse Rama ka preferuar ta shohë atë “rozë”.
Kështu, Kukësi është i vetmi qark ku kryeson Partia Demokratike me 10.700 vota, të përkthyera në 50.86%, ndërsa PS-ja ka siguruar deri më tani 8.525 vota, pra 40.52%.
Në Kukës janë numëruar 96 nga 173 kuti votimi, pra rezultati mund të ndryshojë, por momentalisht kryeson Partia Demokratike në këtë qark, gjë që Rama ka preferuar ta ndryshojë.
