Largimi i bujshëm i Mesut Ozil nga kombëtarja gjermane vazhdon të komentohet akoma, me akuzat e tij për racizëm ai tundi themelet e Federatës Gjermane të Futbollit. Në një intervistë për “Bild”, ylli i Real Madrid dhe i Gjermanisë, Toni Kroos ka kritikuar ish-shokun e skuadrës, Ozil. Po ashtu Kroos ka njoftuar se ai do të vazhdojë të jetë pjesë e skuadrës deri në Kampionatin Europian 2020.
“Unë do të luaj me ekipin kombëtar deri në “EURO 2020”. Kam vendosur një objektiv, që të kem më shumë sukses në turneun e fundit”, ka thënë Kroos në fillim të intervistës.
Lojtari foli për këtë me trajnerin Joachim Low, i cili tregoi mirëkuptim për qasjen e tij. “Megjithatë, ai luftoi për mua që të vazhdoja në kombëtare. Së bashku do të gjejmë zgjidhje në mënyrë që herë pas here të kem ndonjë pushim”, tha Kroos.
“Mënyra se si dha dorëheqjen Ozil nuk ishte e saktë. Pjesa e deklaratës së tij përmbante gjëra, që nuk ishte e nevojshme për t’iu referuar. Unë mendoj se Ozil e di se nuk ka racizëm brenda kombëtares gjermane, as DFB, ai tha shumë budallallëqe. Përkundrazi, ne kemi qenë gjithmonë të angazhuar për diversitetin dhe përfshirjen, madje kemi qenë shembull të kësaj” , përfundoi Kroos.
