Pak ditë pas ngjarjes së rëndë në fshatin Shallës të Konispolit, detaje të reja kanë dalë nga krimi I dyfishtë në familjen Islamaj, ku Hysen Islamaj, vrau me sëpatë gruan Sheno Islamaj, ndërsa më pas ai u shty nga djali i tij Klementin Islamaj, nga shkallët e banesës dhe ndërroi jetë.
I biri, Klementin Islamaj tashmë në burg me akuzën e “vrasjes në kushtet e tronditjes së fortë psikike”, ka dhënë dëshmi të tjera mbi këtë tragjedi. 41-vjeçari ka deklaruar se ditën e ngjarjes pasi i kishte vrarë nënën, babai e kishte kërcënuar edhe atë.
“Babai në dorën e djathtë mbante një gotë qelqi të tejdukshëm dhe sapo u ndodh përballë meje, unë i fola, duke i thënë “se çfarë kishte bërë” dhe ai mu përgjigj: “Se çfarë desha e bëra, tani e keni radhën ju” dhe menjëherë pas këtyre fjalëve, më ka goditur me gotën që mbante në dorë në pjesën e fytyrës dhe hundës, por pa e lëshuar gotën nga dora. Në këtë moment, duke mos parë dhe fëmijët aty, jam trembur se dhe fëmijëve mund t’u kishte ndodhur e njëjta gjë”.
Në këto kushte, ka rrëfyer Klementin Islamaj, e ka goditur fizikisht të atin. “Nga ky moment jam tronditur shumë dhe jam munduar t’i shmangem babait, shumë i tronditur nga ajo se çfarë pashë dhe nga mos gjetja e fëmijës, e kam qëlluar me grushte dhe shkelma babain, por nuk kam përdorur asnjë lloj sendi kur e kam goditur. Pashë që babai është rrëzuar dhe kishte akoma shenja jete; në moment jam kthjelluar disi dhe u bëra pishman”, tha ai
41-vjeçari Klementin Islamaj ka pohuar se, prej shumë vitesh, babai ushtronte dhunë verbale dhe fizike ndaj nënës së tij për motive xhelozie por edhe të shqetësimeve të shëndetit mendor.
