Kryetari i Komisionit Qendror të Zgjedhjeve ka dalë në një deklaratë për shtyp, ku njofton se ka nisur shpërndarja e materialeve zgjedhore, ndërsa bëri thirrje që subjektet politike të respektojnë heshtjen zgjedhore.
Gjithashtu, në deklaratën e tij, Zguri paralajmëroi se KQZ nuk do të lejojë askënd të cenojë procesin zgjedhor, të cilin e cilësoi si më të rëndësishëm se çdo subjekt politik.
“KQZ ka mbyllur punën parapërgatitore dhe është duke mbikëqyrur shpërndarjen e materialeve. Administrata zgjedhore gati të menaxhojë procesin dhe për t’i dhënë vendit zgjedhje të pakontestueshme dhe me standarde të larta. Kemi në dispozicion administratën për çdo parregullsi.
Dua të paralajmëroj se KQZ nuk do tolerojë askënd që me veprimet apo mos veprimet e tij të cenojë ecurinë apo mospërmbylljen me sukses të procesit zgjedhor. Ka vullnet të plotë për të kundërshtuar çdo shkelje. Procesi zgjedhor më i rëndësishëm se çdo parti. Komisionerët dhe numëruesit në shërbim të ligjit jo partive. Partitë e kanë përmbyllur fushatën dhe i kanë përcjellë mesazhet tek zgjedhësit. Sot e nesër fuqinë e kanë zgjedhjet. Partitë të heqin dorë nga çdo dalje publike në funksion të fushatës, mediat të ndërpresin promovimin e kandidatëve”, deklaroi Zguri.
