Komisioni Qendror i Zgjedhjeve ka miratuar përmbajtjen e fletës së votimit për zgjedhjet e 11 majit, duke marrë parasysh propozimet e partive politike. Komisioneri Ilirjan Celibashi njoftoi se është pranuar sugjerimi i përfaqësuesit të PD-së, Marash Logu, për të bërë korrektime në emrat e kandidatëve me dy mbiemra.
Celibashi theksoi se fleta e votimit do të jetë gati një muaj para nisjes zyrtare të fushatës, një zhvillim i rëndësishëm që do të ndihmojë partitë politike gjatë fushatës zgjedhore.
“Vendimmarrja e sotme konsistonte në përmbajtjen e fletës së votimit, se si do të paraqiten kandidatët në fletën e votimit. Duke marrë në konsideratë propozimin e zotit Logu, do të miratojmë fletën e votimit për të 12 qarqet, duke bërë korrigjimet e nevojshme për kandidatët me dy mbiemra. Kjo do të jetë përmbajtja për Tiranën, ndërsa për qarqet e tjera do të bëhet publike në vijim,” deklaroi ai.
Ndërkohë, fleta e votimit për diasporën pritet të jetë gati në javën e parë ose të dytë të prillit. Celibashi shtoi se procesi i përzgjedhjes së kompanisë për printimin e fletës është drejt përfundimit dhe shpërndarja për votuesit jashtë vendit do të nisë sapo të përfundojë ky proces.
“Besoj se fillimi i javës së parë ose të dytë të prillit do të jetë momenti kur do të fillojë shpërndarja në diasporë. Nëse printimi realizohet më shpejt, atëherë ky proces mund të nisë edhe më herët,” sqaroi ai.
Ky është një hap i rëndësishëm drejt organizimit të zgjedhjeve të 11 majit, duke siguruar transparencë dhe përgatitje të plotë për procesin zgjedhor.
