Gjithkush që kërkon të financojë partinë për të cilën bën “tifo”, duhet ta bëjë atë sipas rregullave që vendosen para “lojës”.
Komisioni Qendror i Zgjedhjeve miratoi udhëzuesin dhe formularin e standardizuar të raportimit financiar të fushatës zgjedhore.
Miratimi i këtyre dokumenteve synon rritjen e transparencës në lidhje me fondet e përfituara dhe të shpenzuara nga subjektet politike, për qëllime të fushatës zgjedhore.
Formulari i ri përmban detaje më të hollësishme, si për të ardhurat, ashtu edhe për shpenzimet e partive politike.
Pas plotësimit, formulari do të dorëzohet në KQZ dhe do të publikohet në faqen zyrtare të internetit të këtij institucioni, menjëherë pas përfundimit të fushatës zgjedhore.
Formulari tip synon:
- Rritjen e transparencës në lidhje me fondet e përfituara dhe të shpenzuara nga subjektet zgjedhore për qëllime të fushatës zgjedhore, pasi përmban detaje të hollësishme si për të ardhurat, ashtu edhe për shpenzimet.
- Lehtësimin e raportimit nga ana e subjekteve zgjedhore për fondet e përfituara dhe të shpenzuara për qëllime të fushatës zgjedhore. Në formular raportohen veçmas dhe në mënyrë të detajuar fondet publike dhe fondet jopublike. Gjithashtu, formulari ka një hapësirë të posaçme për detajimin e shpenzimeve për mitingje të fushatës, duke dhënë informacion të detajuar për këtë zë të shpenzimeve.
- Lehtësimin e përpunimit të informacionit nga ana e strukturës së posaçme në KQZ për shqyrtimin e raporteve financiare dhe kryerjen e verifikimeve përkatëse.
