Dy prokurorë dolën sot para Komisionit të Pavarur të Kualifikimit për të dëgjuar vendimet që lidhen me karrierën e tyre.
Prokurori i Tiranës, Dritan Nushi, dhe Gentjan Habazaj, prokuror i Beratit, u konfirmuan në detyrë nga dy trupa të pavarura komisionerësh që kontrolluan për disa muaj dosjet e tyre.
Me shumicë votash, të dy prokurorët siguruan kualifikimin në detyrë pasi më herët u kontrolluan për tre kriteret që përcakton ligji i verifikimit të magjistratëve në Shqipëri.
Dosjet e tyre u kontrolluan për të ardhurat financiare në vite, për aftësitë profesionale gjatë ushtrimit të detyrës dhe nëse kishin patur lidhje apo kontakte me persona të skeduar apo me të shkuar kriminale.
Dritan Nushi e ka filluar karrierën në sistemin e drejtësisë në vitin 2002 po në Prokurorinë e Tiranës, funksion që e mban edhe sot.
Ndërsa Gentjan Habazaj e ka filluar karrierën e tij në Prokurorinë e Durrësit në vitin 2009 dhe që prej vitit 2010-të e ushtron detyrën e prokurorit në rrethin gjyqësor të Beratit.
