Kolegji i Posaçëm i Apelimit ka vendosur të shkarkojë nga detyra kreun e Prokurorisë së Lezhës, Erjon Shehaj, duke rrëzuar vendimin e mëparshëm të Komisionit të Pavarur të Kualifikimit, që e kishte konfirmuar në detyrë. Ky vendim vjen pas ankimimit të bërë nga Komisioneri Publik, me pretendimin se prokurori Shehaj kishte shkelje serioze në pasuri dhe në profesionalizëm.
Gjatë seancës ku u shpall vendimi, trupi gjykues i KPA theksoi se Shehaj kishte cenuar garancitë proceduriale të personave të përfshirë në dosje penale dhe kishte dështuar të kryente veprimet e duhura hetimore në disa raste. Në katër çështje të analizuara, u evidentuan shkelje konkrete nga ana e tij, ndërsa në një rast tjetër, ku kishte konflikt interesi, përfshirja e tij çoi në pavlefshmëri të akteve të procesit penal.
Një nga arsyet më të forta që ndikoi në vendimin e KPA ishte përfshirja e drejtuesit të SPAK, Altin Dumani, në seancën e 19 marsit, tashmë edhe në rolin e Komisionerit Publik. Dumani kërkoi shkarkimin e Shehajt duke e akuzuar për shkelje të rënda profesionale që kanë cenuar besueshmërinë e sistemit të drejtësisë dhe kanë penguar zhvillimin e hetimeve në çështje me rëndësi të veçantë.
Sipas Dumanit, Shehaj ka marrë vendime të paarsyeshme për të pushuar hetime pa kryer procedurat e nevojshme ligjore dhe pa analizuar me kujdes provat e çështjeve. Në një rast konkret, ai kishte mbyllur hetimin ndaj një të dyshuari për korrupsion të lartë, duke injoruar fakte dhe indicie që tregonin përfshirjen e tij në vepra penale.
Për më tepër, Dumani solli në vëmendje disa denoncime të tjera ndaj Shehajt, ku ai kishte dështuar të kërkonte masa sigurie ndaj personave nën hetim, duke i lënë ata të lëviznin të lirë pavarësisht provave të mjaftueshme për arrestimin e tyre. Sipas tij, kjo sjellje jo vetëm që ka dëmtuar imazhin e SPAK, por ka lëkundur edhe besimin e publikut në institucionet e drejtësisë.
Me këtë vendim, KPA i jep fund karrierës së Erjon Shehajt në drejtësinë shqiptare, duke e cilësuar të papërshtatshëm për të vijuar detyrën për shkak të shkeljeve të përsëritura dhe mungesës së integritetit profesional.
Në arsyetimet e KPA gjatë seancës së sotme ku edhe u mor vendimi theksohet se:
Erjon Shehaj nuk ka kryer veprime hetimore për dosjet dhe ka cenuar garancitë proceduriale të personave.
Lidhur me një nga çështjet trupi gjykues shprehet se nuk do të mbajë qëndrim, pasi çështja është për gjykim në Gjykatën e Lartë.
Për 4 raste trupa gjykues vlerëson se janë konstatuar shkelje nga ana e subjektit të rivlerësimit.
Në një nga procedimet Shehaj duhet të hiqte dorë pasi ishte në konflikt interesi. Përfshija e tij në këtë procedim ka shkaktuar pavlefshmëri të akteve të procesit penal.
Në seancën e 19 marsit drejtuesi i SPAK, Altin Dumani tanimë me kompetencat edhe të Komisionerit Publik, kërkoi shkarkimin e tij për shkelje të rënda profesionale. Dumani argumentoi se Shehaj kishte pasur mangësi serioze në ushtrimin e detyrës dhe se veprimet e tij kishin dëmtuar besueshmërinë e sistemit të drejtësisë, duke sjellë pasiguri dhe duke penguar hetimin e disa çështjeve të rëndësishme.
Dumani përmendi disa raste ku Shehaj kishte dështuar të ndiqte procedurat ligjore të parashikuara, duke e bërë të pamundur zhvillimin e hetimeve të thelluara dhe të plota. Sipas tij, prokurori Erjon Shehaj kishte marrë vendime të paarsyeshme për të pushuar hetimet, pa zbatuar kërkesat ligjore për mbledhjen e provave dhe pa shfrytëzuar mundësitë që ligji ofron për të bërë hetime të thelluara në disa çështje të mëdha.
Një nga shkeljet më të rënda të identifikuara nga Dumani ishte vendimi i Shehajt për të pushuar hetimin ndaj një individi të akuzuar për korrupsion të lartë, pa marrë parasysh faktet dhe provat që treguan se ky individ mund të kishte kryer vepra penale. Dumani theksoi se, në vend që të zhvillonte hetime të mëtejshme, Shehaj e kishte pushuar dosjen pa një analizë të detajuar të provave dhe rrethanave të çështjes.
Gjithashtu, Dumani solli në vëmendje disa denoncime të tjera që ishin bërë ndaj Shehajt, përfshirë rastet kur prokurori kishte lënë të pashfrytëzuara mundësitë për të kërkuar masat e sigurisë për individët që ishin në kërkim, duke i lënë ata të shëtisin lirisht, pavarësisht se ekzistonin prova të mjaftueshme për të kërkuar arrestimin e tyre. Kjo, sipas Dumanit, kishte krijuar një imazh të dobët të SPAK dhe kishte dëmtuar besimin e qytetarëve në sistemin e drejtësisë.
