Kolegji i Posaçëm i Apelimit (KPA) ka shpallur më 16 janar 2025 vendimin në çështjen e prokurores së Tiranës, Eriselda Bala, duke pranuar ankimin e saj dhe rikthyer atë në detyrë.
KPK e shkarkoi prokuroren Bala më 7 prill 2022 për probleme me pasurinë, pasi konsideroi se ajo kishte blerë një apartament në Tiranë në kushte që nuk justifikoheshin financiarisht dhe kishte kryer deklarime të pasakta lidhur me burimet financiare.
Megjithatë, KPA vlerësoi se ankimi i prokurores ishte i drejtë dhe se vendimi i KPK-së ishte i pabazuar. Kolegji shqyrtoi provat dhe argumentet e administruara dhe arriti në përfundimin se Bala kishte mundur të justifikonte blerjen e apartamentit me burime financiare të ligjshme, duke përfshirë dhuratat dhe huatë e marrë nga familjarët. Po ashtu, u vlerësua se pagesat për apartamentin ishin kryer në mënyrë të ligjshme, megjithëse disa nga transaksionet bankare ishin raportuar si të dyshimta nga KPK.
KPA theksoi se pasaktësitë në deklaratat për pasurinë dhe huatë nuk kishin ndikim të rëndësishëm në vlerësimin e përgjithshëm të figurës dhe pasurisë së prokurores. Bazuar në këto prova, Kolegji vendosi të rrëzojë vendimin e KPK-së dhe të rikthejë Eriselda Balën në detyrë si prokurore, duke konfirmuar se ajo kishte justifikuar burimet e pasurisë së saj dhe se ishte e besueshme në kriterin e pasurisë.
