Ministria e Zhvillimit Ekonomik (MZHE) e Kosovës, po synon të krijojë një sektor të zhvilluar të energjisë, të favorshëm për mjedisin dhe shëndetin në mbështetje të zhvillimit të qëndrueshëm ekonomik dhe mirëqenies shoqërore në Kosovë, në kuadër të një tregu të lirë dhe konkurrues të energjisë.
Është ministri Blerand Stavileci ai që ka prezantuar këtë synim në kabinetin qeveritar, që më pas edhe është përkrahur nga kryeministri dhe ministrat e tjerë të Qeverisë së Kosovës.
Stavileci tha se ka përgatitur një strategji, që në dhjetë vitet e ardhshme të ketë furnizim të sigurt me energji elektrike, të ketë bilanc energjetik, me kosto të përballueshme të investimeve, të ulë nivelin e emisionimit, të mbështetur në burime të ripërtritshme, si dhe integrim në tregun regjional.
“Qeveria do të vazhdojë të përkrahë projektin e ndërtimit të Termocentralit “Kosova e Re”, me kapacitet prej 450 megavat/orë energji elektrike me investime të sektorit privat në kuadër të partneritetit publik-privat. Bazuar në ecurinë e deritashme të projektit Qeveria konsideron të realizueshëm këtë projekt deri në vitin 2023.
Ndërtimi i Termocentralit “Kosova e Re” do zbatohet në harmoni me kërkesat e Direktivës 2010/75/EC. Ky termocentral do të ketë edhe mundësinë e koogjenerimit në masën 10% të kapacitetit neto të instaluar”, ka thënë ministri Stavileci.
Në fokus të kësaj strategjie, përveç energjisë elektrike, është edhe zgjerimi i sistemeve ekzistuese të energjisë termike, në një plan afatmesëm, si dhe zhvillimi i sistemeve të reja në pjesët e urbanizuara të qyteteve të mëdha, shkruan Telegrafi.
