Invalidët e luftës në Kosovë po mbajnë një grevë pranë Ministrisë së Punës dhe Mirëqenies Sociale, për shkak të pakënaqësive të tyre në lidhje me pensionet.
Ata u shprehën se shteti i ka injoruar, ndërsa e quajnë turp, faktin që nuk i vizitoi askush.
Ish-luftëtari i UÇK-së, Skënder Havolli, ka shprehur mllefin e tij ndaj politikanëve. Këta të fundit nuk e kanë vizituar asnjëherë dhe aq më pak t’i kenë ofruar kushtet, të cilat invalidët e luftës i kërkojnë.
“S’e kam besuar asnjëherë. Kam menduar që këta janë njerëz e këta s’qenkan njerëz hiç. Kam humbur gjymtyrë për këtë atdhe e këta s’kanë marrë masa hiç. Tash e kam statusin e invalidit të luftës”, tha Havolli.
Një tjetër pjesëtar i grevës u shpreh se nuk kanë ndërmend ta ndërpresin atë, deri sa të realizohen kërkesat e tyre, shkruan Klan Kosova.
Ja çfarë thanë invalidët e luftës, lidhur me neglizhencën e shtetit ndaj kontributit të tyre:
“Është turpi më i madh që këtë ditë askush nuk erdhi t’i vizitojë këta invalidë. Shkojnë tek varret e kriminelëve që kanë vrarë foshnjet kosovare, kanë dhunuar gra, e jo tek ky që ka humbur gjymtyrët.”
“Ne nuk jemi ato që anashkalohemi. Ne kemi kaluar kohën në mal në luftë. Veteranët, invalidët që kanë marrë kartelat me lekë nuk kanë fytyrë që të vijnë’.”
“Me shëndet jemi shumë keq. Për momentin jemi 10 persona, nuk do dorëzohemi nga kërkesat tona. Gjatë ditës ishim më shumë të pranishëm”.
“Ne jemi të burgosur nga problemet që na kanë ngelur si pasojë e luftës e askush nga institucionet nuk na merr parasysh. Nëse ka të drejtë një shtet të na mbajë të robëruar, atëherë edhe nesër do të vazhdojmë grevë urie. Buxheti i invalidëve është i veçantë ai duhet të ndahet. Ne jemi të vdekur derisa askush nuk merr parasysh kërkesat tona”.
