Gjermani është mposhtur nga Koreja e Jugut në ndeshjen e tretë të grupit F, me rezultatin 2-0. Një humbje dramatike për kampionët në fuqi të cilët nuk arrijë të kalojnë as grupin në Rusi. Ishte Kim-Young dhe Son autorët e golave në kohën shtesë të cilët firmosën kapitullimin e Gjermanisë.
Gjermanët e Low e nisin ndeshjen në sulm duke kërkuar me çdo kusht golin e avantazhit, por nuk tregohen asnjëherë të saktë para portës. Mungon qetësia në sulm edhe pre kishte shumë ndryshime nga ndeshja e fundit. Nga ana tjetër Koreja e Jugut tregohet më e duruar dhe përpiqet të përfitojë nga ndonjë kundërsulm.
Statistikat ishin të tilla që gjermanët kontrollojnë lojën, ndërsa koreanët kishin krijuar më shumë raste dhe kishin goditur më shumë portën e mbrojtur nga Neuer.
pjesa e dytë fillon si u mbyll e para, Gjermania dominon në çdo repart, por nuk është e rrezikshme para portës. Trajneri Low ndërhynë duke shtuar forcat në sulm me Muller, Brandt dhe Gomes. Ndërsa tensioni u rrit më shumë në momentin që Suedia kalon në avantazh përballë Meksikës dhe fitorja kthehet në detyrim.
Por kur të gjithë prisnin golin e gjermanëve janë koreanët që befasojnë dhe dërgojnë topin në rrjetën e Neuer me Kim-Young. Pas një goditje dënimi rrëmujë në zonë dhe Young i vetëm para portës e ka të lehtë të shënojë, më pas ndërhyn edhe VAR për të konfirmuar golin.
Ndërsa pas tij është lojtari i Tottenham që vulos çdo gjë. Neuer kishte dalë në sulm për të shënuar, ndërsa Son përfiton nga një largim i topit nga zona dhe e dërgon topin me qetësi në rrjetë. Mallkimi i grupit F u konfirmua, por edhe rregulli i pashkruar se kampionët në fuqi nuk e kalojnë grupin.
Ndërkohë Suedia ka treguar se disfata e sekondave të fundit ndaj Gjermanisë nuk ka ndikuar psikologjikisht duke mposhtur Meksikën me rezultatin e pastër 3-0. Pas një pjese të parë pa gola, ishte Agustinsson ai që zhbllokon rezultatin në minutën e 50’. Pas tij, kapiteni Granqvist dyfishon rezultatin nga pika e bardhë e penalltisë. Edhe një autogol i Alvarez fundos më keq Meksikën e pashpresë teksa Suedezët sigurojnë kalimin në fazën e 1/8-ave.
