Kim Jong-un ka paralajmëruar se së shpejti do të ndodhë një ngjarje e madhe dhe e rëndësishme.
Bëhet fjalë për testimin e një bombe të re bërthamore, e cila do të shpërthejë të shtunën në një tunel.
Të paktën kështu raportojnë mediat e huaja, të cilat shkruajnë se zyrtarët e Ushtrisë amerikanë po frikësohen se së shpejti mund të ndodhë ky testim i një bombe të re bërthamore.
Në fakt, edhe gazetarëve të huaj, që po vizitojnë Korenë e Veriut, u është thënë se ata duhet të jenë të përgatitur për një ngjarje të madhe që pritet të ndodhë të shtunën.
Megjithatë, zyrtarët e Koresë së Veriut nuk kanë dhënë detaje të tjera lidhur me këtë event të rëndësishëm, që pritet të ndodhë për festën e “Ditës së Diellit”.
Kjo është festa më e madhe kombëtare e Koresë së Veriut, e cila shënon përvjetorin e 105-të lindjes së presidentit të saj themelues Kim Il Sung, më 15 prill.
Situata duket mjaft e tensionuar, teksa SHBA ka pozicionuar më herët anije luftarake, si dhe ka paralajmëruar se Koreja e Veriut mund të ndërmarrë një sulm bërthamor mbi Shtetet e Bashkuara.
