Në një intervistë për CNN një zyrtar i lartë i Koresë së Veriut thotë se do të testojnë një tjetër bombë bërthamore në Oqeanin Paqësor.
Sipas tij, kërcënimi i ministrit të jashtëm koreano-verior në OKB se Pheniani do të testojë një raketë bërthamore, duhet të merret seriozisht. Koreja e Veriut i ka kthyer gjithmonë fjalët në vepra, tha zyrtari i lartë, duke nënvizuar se këto deklarata vijnë në përputhje me qëllimet që ka lideri komunist Kim Jong-Un.
Peniani ankohet për mungesën e kanaleve diplomatike me Uashingtonin, pavarësisht se Sekretari i Shtetit Rex Tillerson këmbëngul prej muajsh se ato janë funksionale, shkruan alsat.
Tensionet mes Shteteve të Bashkuara të Amerikës dhe Koresë së Veriut mbeten të larta pas deklaratës së presidentit Trump në OKB. Shefi i Shtëpisë së Bardhë deklaroi se nëse regjimi komunist do të lëshonte një raketë ndaj territorit amerikan, ai do të shkatërronte menjëherë Korenë e Veriut.
