Situata tek Juventusi për Paulo Dybalan duket se sa vjen dhe ftohet dhe ky i fundit ka menduar seriozisht të largohet. Lajmi vjen pas mbylljes së merkatos së janarit dhe ajo që konfirmon është revista “Chi” e cila u kushton një hapësirë mjaft të gjerë kronikave rozë.
Sipas kësaj reviste, sulmuesi argjentinasi nuk e ka rinovuar kontratën e qirasë me pronarët e apartamentit luksoz në Torino dhe kjo përbën një tregues se Dybala po mendon seriozisht të ndryshojë ambient pas mbylljes së sezonit. Gjithnjë sipas ‘Chi’, Dybala ka përcaktuar edhe destinacionin e tij që është kampionati spanjoll dhe Barcelona.
Dybala e nisi mjaft mirë sezonin, por më pas loja e tij pësoi një rënie të dukshme, aq sa bëri që trajneri Allegri ta lërë atë shpesh në pankinë në ndeshjet e Juventusit. Gjërat për Dybalan u komplikuan akoma më shumë nga dëmtimet të cilat e kanë penguar që të stërvitet në mënyrë konstante. Ai nuk do të luaj edhe në përballjen me Fiorentinën të premten.
Një situatë kjo që e ka bërë Dybala që të mendojë vërtet largimin tek Barcelona, ndërkohë që në këtë moment është duke punuar për riaftësimin nga një dëmtim që e ka lënë jashtë fushave për 1 muaj.
