Të paktën 12 mijë maturantë kanë konkurruar në Universitetin e Prishtinës gjatë 4 ditëve të para të shpalljes së konkursit për pranim. Megjithatë, mësohet se në këtë universitet është planifikuar të pranohen vetëm 6869 studentë, prej të cilëve 5969 studentë të rregullt dhe 900 studentë me korrespondencë.
Interes më të madh studentët kanë shfaqur në Fakultetin e Edukimit, në të Mjekësisë, në Fakultetin Ekonomik, në Filozofik dhe në atë të Filologjisë.
Drejtori i Zyrës për Teknologji të Informacionit në UP, Isak Shabani, ka bërë të ditur për gazetën “Zëri” se sipas statistikave të grumbulluara deri të enjten, në orën 13:00, për regjistrim në programet e studimeve në UP janë paraqitur 12.202 kandidatë, prej të cilëve 10.723 veta janë verifikuar, ndërsa 1.479 pritet të verifikohen.
Konkursi është i hapur deri të hënën e ardhshme.
