Të tjera detaje kanë dal në pah lidhur me ngjarjen ku mbeti i arrestuar ish-deputeti Mark Frroku.
Policia në njoftimin e saj zyrtar bëri me dije se në vendngjarje është gjetur një gëzhojë arme zjarri, por nuk ka specifikuar se kush kishte qëlluar.
Ndërkohë, tashmë burime për mediat tregojnë se ka dyshime se truproja e ish-deputetit ishte personi që qëlloi me armë zjarri.
Shkak për nisjen e konfliktit është bërë një tokë në zonën bregdetare për të cilën banorët e zonës dhe përfaqësues të Kishës Katolike pretendojnë se kanë certifikatë pronësie. Konflikti ka marrë përmasa më të mëdha kur përfaqësuesit e kishës katolike nisën të bënin rrethimin e pronës, duke u përballur me kundërshti nga ana e banorëve.
Si pasojë e konfliktit me sende të forta kanë pësuar dëmtime të lehta disa nga personat e përfshirë në konflikt, të cilët pasi kanë marrë ndihmë mjekësore, janë shoqëruar në polici, me qëllim kryerjen e veprimeve për sqarimin e rrethanave të ngjarjes.
