Ekspertja e ekonomisë, Brisida Shehaj, ka komentuar tensionet mes Erion Veliajt dhe Edi Ramës, duke e cilësuar ndërhyrjen e qeverisë në Bashkinë e Tiranës si të paligjshme. Sipas saj, pushteti vendor është autonom dhe çdo ndërhyrje nga qeveria qendrore bie ndesh me ligjin.
Shehaj e interpreton tërheqjen e Veliajt nga emërimi i Sara Goxhajt si një shenjë e një marrëveshjeje të heshtur mes tij dhe Ramës. Ajo thekson se kjo situatë konfirmon ekzistencën e një konflikti mes kryeministrit dhe kryebashkiakut, por në fund të fundit, regjisori i vërtetë i aferave në Bashkinë e Tiranës është vetë Rama.
“Kryeministri nuk mund të ushtrojë presion mbi institucionet vendore. Rama nuk mund të vendosë vetë se si duhet të funksionojë Bashkia e Tiranës. Kjo ishte një betejë forcash dhe në fund të dy palët u dakordësuan. Ajo që mbetet për t’u parë është se çfarë fitoi Veliaj dhe çfarë humbi Rama. E vetmja gjë e sigurt është se ky konflikt është tashmë i hapur”, u shpreh Shehaj.
Ajo theksoi se nëse Rama nuk do të ishte drejtuesi i prapaskenave, do të kishte marrë masa kundër Veliajt më herët. Për momentin, situata në Bashkinë e Tiranës mbetet e tensionuar, me zhvillime që pritet të qartësohen në vijim.
