Komisioni Suprem i Dijetarëve të Arabisë Saudite ka dënuar sulmet e fundit në Egjipt, ku u goditën dy kisha, të cilat lanë pas me dhjetëra viktima dhe të plagosur. Në një deklaratë të shpërndarë në mediat sociale, Komisioni Suprem i Dijetarëve të Arabisë Saudite thekson se ky akt është i ndaluar, sipas ligjit islam, dhe se ngjarje të tilla cenojnë stablitetin dhe jetën e njerëzve.
‘‘Shpërthimi që shënjestroi dy kisha në Egjipt është një akt kriminal i ndaluar në ligjin islam. Myslimanët kanë mendim unanim se akte të tilla cenojnë sigurinë, stabilitetin dhe jetën e njerëzve. Një besimtar, që beson Zotin dhe Ditën e Gjykimit, nuk kryen krime të tilla. Krime të ngjashme mund të kryhen vetëm nga persona me besim të devijuar’’, shkruhet në deklaratë.
Duke iu referuar burimeve zyrtare, aktin e ka dënuar gjithashtu edhe Ministria e Jashtme e Arabisë Saudite. Sipas burimeve pranë kësaj ministrie, bëhet e ditur se këto akte terroriste bien ndesh me parimet fetare dhe vlerat morale e njerëzore. Ndërsa ka shprehur ngushëllimet për familjet e viktimave, shoqëruar me lutje për të plagosurit.
