Kryetarja e Kuvendit, Elisa Spiropali, ka reaguar pas publikimit të opinionit të Komisionit të Venecias lidhur me procesin për mandatin e deputetes Olta Xhaçka. Ajo theksoi se qëndrimi i mbajtur nga Kuvendi ishte i bazuar në Kushtetutë dhe jo politik.
“Besoj tani është e qartë për të gjithë se qëndrimi ynë lidhur me procesin e trajtimit të mandatit të deputetes Olta Xhaçka nuk ishte një qëndrim as politik, as partiak, por një qëndrim kushtetues që lidhet me sovranitetin e paprekshëm të Kuvendit,” deklaroi Spiropali.
Ajo kritikoi Gjykatën Kushtetuese, duke vënë në dukje se kërkesa për të diktuar mënyrën e votimit të deputetëve përbënte një ndërhyrje në pavarësinë e Kuvendit. “Gjykata Kushtetuese ka kërkuar që deputetët të votojnë në një mënyrë të caktuar, dhe kjo nga ne është lexuar jo thjesht si ndërhyrje në pavarësinë e Kuvendit, por në radhë të parë si një vendim i pazbatueshëm,” shtoi ajo.
Spiropali falënderoi Komisionin e Venecias për shqyrtimin e çështjes me seriozitet dhe shpejtësi. “Sot morën përgjigje edhe të gjitha akuzat, shpifjet dhe propaganda me të pavërteta kundër këtij qëndrimi, por si Kryetare Kuvendi ndjehem e lehtësuar dhe për këtë falënderoj Komisionin e Venecias,” theksoi ajo.
Në përfundim, kryetarja e Kuvendit shprehu bindjen se opinioni i Komisionit do të shërbejë si bazë për zgjidhje të drejtë të çështjeve të ngjashme në të ardhmen. “Kam bindjen se ky opinion i drejtë do t’u shërbejë të gjitha palëve dhe institucioneve për reflektim,” përfundoi Spiropali.
