Ergys Kaçe me siguri këtë afat kalimtarë do ta shfrytëzojë ë së miri për tu larguar nga ekipi i PAOK-ut. Pasi për shqiptarin që nga nëntori i kaluar nuk ka pasur më vend në ekip nga trajneri Lucescu. Edhe pse e nisi sezonin si protagonist, duke luajtur në ndeshjet e para të superligës greke, për afro tre muaj mesfushori nuk është aktivizuar në ndeshjet e kampionatit.
Hera e fundit që Kaçe ka zbritur në fushë është në Kupën e Greqisë, ku PAOK fitonte me rezultatin e thellë 5-0 në fushën ë Aiginiakosit. Situata e krijuar rreth 24-vjeçarit e bën thuajse të paevitueshëm largimin, ndërsa menaxheri i Kaçes ka diskutuar në disa raste me drejtuesit e klubit për këtë situatë.
Duket se palët kanë rënë dakord që më e mira për të gjithë do të ishte që mesfushori të gjente një ekip tjetër në merkaton e janarit. Me këtë lëvizje Ergys Kaçe synon të gjejë një klub ku të ketë hapësira për të treguar kualitetin e tij, por mbi të gjitha për të qenë në formë dhe të mbajë vendin në Kombëtare për periudhën e përgatitjeve drejt kualifikueseve të Europianit 2020 dhe të Ligës së Kombeve.
