“Kokëshkreti” McGregori, tani “luan” edhe me gjykatën

Conor McGregor vazhdon të jetë nën vëzhgimin e gjykatës, pas trazirave që shkaktoi dy javë më parë gjatë eventit të UFC-223. Irlandezi goditi me mjete të forta autobusin ku ishin sportistët dhe më pas u arrestua nga policia e Nju Jorkut. Gjykata e la të lirë me kusht pasi pagoi 50 mijë dollarë dhe e lejoi të rikthehej në vendlindje, por më 14 qershor do të dalë sërish para gjykatëses. Por duket se ish-kampioni i arteve marciale mikse ka thyer sot rregullat e gjykatës dhe ka vendosur të udhëtojë jashtë vendlindjes, pra Irlandës. Ai ka udhëtuar sot për në Bahamas për t’u relaksuar me familjen e tij.Por sipas televizionit TMZ, kampioni irlandez ka udhëtuar me avion në Bamahas, pa marrë leje nga gjykata por lejen e ka marrë nga personi i autorizuar për ta mbikëqyrur, Ira Judelson. “Duke qenë se ai është një person ende në gjykim, Conor ka nevojë për miratimin e personit që e mbikëqyr për të udhëtuar dhe për të lënë vendlindjen e tij. Unë ia kam dhënë lejen, por nuk e di se ku ka shkuar. Di vetëm që nuk ka marrë leje nga gjykata”, tha Judelson.