Klubi kosovar mbush arkat nga transferimi i Rashicës

Milot Rashica u transferua pak ditë më parë nga Vitesse tek gjermanët e Werder Bremen për një shumë të majme 7.5 milionë euro. Por ky kalim nuk ka derdhur të ardhura vetëm për ekipin holandez, pasi sipas rregullave të FIFA-s thuhet se 5% e vlerës totale i takon klubit amë, pra atij klubi që e prodhoi lojtarin në aspektin sportiv-profesional. Sipas kësaj rregulloreje ekipi Kosovar KF Vushtrria do të mbushë arkën me një sasi të majme parash që mund të ndërtojë një klub modern dhe konkurrues.

Naser Imeri, kryetari i klubit të parë të Rashicës ka shpjeguar në detaje gjithë këtë:“Kjo është një arritje e madhe edhe për Milotin edhe klubin tonë, jemi krenar që ai ka dal nga ne. Është një rregull nga FIFA që siguron se 5% të shumë totale i takon klubit ame, pra në këtë rast neve. Sipas kalkulime tona ne do të përfitojmë rreth 300 mijë euro, për rastin në fjalë kemi filluar të interesohemi. I kemi shkruar Federatës së Kosovës, FIFA-s dhe kemi angazhuar një agjent. Këto para do t’i shfrytëzojmë duke investuar në shkollën e futbollit Kosova e Vushtrrisë”, ka thënë Imeri.

Rashica ka nënshkruar kontratë me klubin gjerman deri në vitin 2020. Ylli i Përfaqësueses së Kosovës shpesh herë ka ndihmuar ish-klubin e tij nga Kosova edhe nga ana financiare.