Në kuadër të zbatimit të Strategjisë Ndërsektoriale të Drejtësisë 2024-2030 dhe në vazhdën e përpjekjeve për përmirësimin e sistemit të drejtësisë në Shqipëri, ministri i Drejtësisë, Ulsi Manja, zhvilloi një takim me institucionet e drejtësisë dhe partnerët ndërkombëtarë.
Në fjalën e tij, Manja theksoi arritjet e vitit 2024, duke përmendur plotësimin e vakancave për prokurorë nga ana e Këshillit të Lartë të Prokurorisë (KLP) dhe SPAK, si dhe nisjen e rekrutimeve për inspektorë nga Inspektorati i Lartë i Drejtësisë (ILD).
Ai nënvizoi gjithashtu sfidat e mbetura dhe nevojën për koordinim të ngushtë në procesin e integrimit evropian, që vazhdon të jetë prioriteti kryesor i qeverisë shqiptare.
FJALA E MINISTRIT TË DREJTËSISË
Takim me institucionet e drejtësisë dhe partnerët ndërkombëtarë mbi zbatimin e Strategjisë Ndërsektoriale të Drejtësisë 2024–2030 për vitin 2024
Strategjia Ndërsektoriale e Drejtësisë 2024-2030, arritjet dhe sfidat e zbatimit të saj në kontekstin e integrimit evropian
Data: 13 Qershor 2025, ora 11:00
Vendi: Salla “Classic”, Tirana International Hotel
Të nderuar përfaqësues të institucioneve të drejtësisë,
Të nderuar përfaqësues të trupit diplomatik dhe organizatave partnere,
Të nderuar kolegë dhe të ftuar,
Kam kënaqësinë t’ju uroj mirëseardhjen në këtë tryezë, e cila shënon një moment të rëndësishëm reflektimi dhe bashkërendimi institucional në kuadër të zbatimit të Strategjisë Ndërsektoriale të Drejtësisë 2024–2030.
Ky takim monitorues i Strategjisë vjen në një moment kulmor për procesin e integrimit të Shqipërisë në BE, me hapjen e grupkapitullit të parë më 15 tetor 2024 dhe punën tonë të përbashkët në përmbushjen e piketave të ndërmjetme, të cilat hapin rrugën për avancimin e mëtejshëm me të gjithë kapitujt e tjerë, ku deri tani janë hapur negociatat për 24 kapituj dhe presim që vjeshta të na gjejë me të tërë kapitujt e hapur.
Ndaj kjo Strategji Ndërsektoriale përfaqëson një angazhim të qartë për të ndërtuar një sistem drejtësie të pavarur, efikas dhe të besueshëm, në përputhje me standardet dhe me angazhimet tona me BE.
Gjatë vitit 2024, janë shënuar përparime të rëndësishme në disa fusha kyçe të Strategjisë si:
Përfundimi i rivlerësimit të gjyqtarëve dhe prokurorëvë nga KPK me 805 vendime.
Miratuar Strategjia Kombëtare për uljen e çështjeve të prapambetura 2024–2027, një hap i rëndësishëm drejt rritjes së efikasitetit gjyqësor.
SPAK dhe KLP kanë plotësuar vakancat për prokurorë, ndërsa ILD ka vijuar me rekrutimin e inspektorëve jomagjistratë dhe ndihmësinspektorëve.
Megjithatë, sfidat mbeten të pranishme. Zbatimi i mekanizmave të sinjalizimit dhe vlerësimet etike ndaj magjistratëve kanë hasur në vonesa. Po ashtu, përmbushja e objektivave të ndërmjetëm të përcaktuara në kuadër të procesit të integrimit evropian kërkon përpjekje të shtuara dhe koordinim të ngushtë ndërinstitucional në adresimin e masave të parashikuara në Strategji.
Në këtë kontekst, është thelbësore të theksojmë se avancimi i procesit të integrimit, nën drejtimin dhe koordinimin e Ministrisë së Drejtësisë, ka konfirmuar vullnetin politik të Shqipërisë për të thelluar reformat në drejtësi dhe për të përmbushur pritshmëritë e Bashkimit Evropian.
Përmbushja e piketave të ndërmjetme është gurthemeli për avancimin e mëtejshëm të negociatave të anëtarësimit. Ato përfaqësojnë jo vetëm një detyrim ndërkombëtar, por mbi të gjitha një përgjegjësi ndaj qytetarëve tanë për të ndërtuar një sistem drejtësie që garanton të drejtat themelore dhe barazinë para ligjit.
Nga takimi ynë në 13 Dhjetor dhe deri më sot, një periudhë ekzaktësisht 6 mujore, institucionet tona kanë përballuar së bashku mbi 60 orë raportim pranë shërbimeve të Komisionit Evropian dhe kanë përgatitur mbi 1000 faqe raportime me shkrim dhe dokumenta. Kjo punë është treguese e dedikimit dhe profesionalizmit të institucioneve tona dhe një falenderim shkon për secilin nëpunës të institucioneve tona që ka kontribuar në këtë proces.
Në këtë frymë, ju ftoj të vazhdojmë angazhimin në nivelet më të larta drejtuese së bashku për të adresuar veprimtaritë dhe proceset komplekse që duhet të përmbushim brenda një kohe kaq të shkurtër në këtë proces transformues, duke u mbështetur në evidenca të qarta, planifikim të brendshëm të qëndrueshëm dhe bashkëpunim të ngushtë mes njëri-tjetrit dhe me partnerët tanë ndërkombëtarë.
Jam besimplotë se do kemi bashkëbisedime të vlefshme përgjatë kësaj tryeze.
Ju falënderoj për praninë dhe kontributin tuaj të çmuar.
Faleminderit.
