Klopp i “trishtuar”: Coutinho? Nuk kam asgjë për të thënë

Zërat e largimit të Phelipe Coutinho nga “Anfield’ sa vjen dhe bëhen më të fortë. Është raportuar se në orët e fundit Barcelona ka plotësuar kërkesat e Liverpool për të paguar 150 milionë euro. Në prag të derbit me Everton në kuadër të FA Cup, tekniku gjerman Jurgen Klopp para mediave ka lenë të nënkuptohet se edhe mund të ndodhë por edhe mund të mos ndodhë.

“Nuk kam asgjë për të thënë mbi Coutinho. Nuk do të më ndihmonte as mua, as futbollistin dhe as klubin. Gjithçka që mund të them do të ndizte të tjerë zëra, por kështu funskionon merkato, gjithsesi bën pjesë te ata futbollistë që shpresoj të rikuperoj për sfidën me Manchester City, për datën 14 janar”. Kështu, trajneri i Liverpool, Jurgen Klopp zgjedh rrugën e “Pa Koment”, përballë aludimeve mbi të ardhmen e brazilianit, të cilin në Spanjë e shohin gjithmonë e më pranë Barcelonës. E vetmja siguri është që ish-interisti është ende i dëmtuar dhe nesër nuk do të jetë në dispozicion të Klopp për derbin e FA Cup ndaj Everton.

Trajneri gjerman Klopp është ende në kërkim të titullit të parë me Liverpool. “Por nuk varet vetëm nga unë. Ne kemi detyrën që të fitojmë dhe për këtë provojmë që të jemi më pak të parashikueshëm, më shumë të rrezikshëm para portës, dhe të mbrohemi më mirë. Në FA Cup janë vetëm ekipet më të mëdha dhe për këtë duhet të jemi gati. E dimë se si tifozët tanë kanë një dëshirë të çmendur për të fituar diçka, jemi dëshirues po aq sa ata, por duhet ta dëshmojmë në fushë. E di që kam mbi vete presionin se duhet të fitoj diçka, por nuk e ndjej”, deklaroi Klopp.