Ish-drejtori i Agjencisë Saspac, Ilir Beqaj, së bashku me Ermal Kurtulajn dhe Alfred Nikollajn, do të vazhdojnë të qëndrojnë në masën e sigurisë “arrest në burg,” vendosur nga Gjykata e Posaçme. Vendimi u konfirmua të premten, pasi Prokuroria e Posaçme lexoi informacionin e përditësuar të kërkuar nga avokatët në seancën e kaluar.
Beqaj, Kurtulaj dhe Elton Martini kërkuan zëvendësimin e masës së sigurisë, por kjo kërkesë u refuzua nga gjykata. Në korrik të këtij viti, Ilir Beqaj u arrestua me urdhër të prokurores Elida Kaçkini, e cila kreu hetimet për abuzim me fondet e Agjencisë së Menaxhimit të Fondeve të Bashkimit Europian. Përveç Beqajt, në burg përfunduan edhe Ermal Kurtulaj dhe Alfred Nikollaj, ndërsa për Gazmend Haxhinë dhe Elton Martinin gjykata vendosi masën e sigurisë “arrest në shtëpi.”
Ndërkohë, për Bledar Lekën dhe Bjona Ziajn, gjykata ka caktuar masën më të lehtë, “detyrim paraqitjeje.” Akuza, për të cilën Beqaj është vënë në pranga nuk lidhet me detyrën e tij si ministër shëndetësie në vitet 2013-2017, por me postin që mbajti si drejtuesi i Agjencisë shtetërore SASCAP, e krijuar për të menaxhuar ndihmat e donatorëve të huaj, që nga viti 2021.
Masa e sigurisë është marrë me kërkesë të SPAK edhe për fshehje të pasurisë dhe pronësisë në një restorant emrin GZONA në kalanë e Tiranës Në vitet 2022-2023, prokurorët kanë zbuluar një skemë korruptive me të paktën 8 aktivitete e konferenca, ku fituesit apo organizatorët paracaktoheshin. Në një rast shërbimi për një konferencë, prokuroruar me vlerë 125 mijë euro rezultoi se nga kompania fituese ishte ofruar vetëm darka në vlerën 4 milionë lekë. Kjo darkë ishte ofruar në restorantin që drejtohej në hije nga ish ministri.
